بسم الله الرحمن الرحيم
وبه نهتدي ونستعين
الموضوع عبارة عن نوتة مكونة من بعض النصائح للسادة ممثلينا في البرلمان لعام 2012
- أدخل برجلك اليمين وقول اللهم إني أعوذ بك من كرسي يبعدني عنك وعمن وثقوا بي.
- اقرأ الفاتحة والمعوذتين وياريت كمان لو آية الكرسي حافظهم ولا أيه النظام؟؟؟ أكيد هتلاقي حد جارك من السادة الإسلاميين ومش صعب البحث عنهم على فكرة سيماهم على وجوههم دول أكتر من 75% دلوقت :P
- بمجرد ما تقرب ناحية الكرسي المخصص ليك حضرتك تكون مجهز شوية مية نار علشان الناس اللي كانت قاعدة في المكان ده قبل كدة كان ليهم وضع خاص :))
- بعد الغسيل والمكواة للكرسي بص للكرسي ده وجرب تبكي شوية على الناس اللي وهبت حياتها علشان حضرتك تقدر للكرسي ده بدون ما يكون ليهم أغراض تذكر إن لولا الناس دي ما كنت حضرتك وصلت حتى للبوابة من برة وبردو تكملةً لنفس النقطة ناس تاني ساهمت في وصولك لمكانك ده منهم أنا وأخويا وأبويا وأمي وكل الشعب مهما كانت ديانتهم ومهما كانت توجهاتهم وزي ما وصلوا حضرتك لمكانك من السهل جداً في لحظة تطير وانت مش أقوى من مبارك ولا أقوى من أمن الدولة ولا أقوى من العادلي وباقي الشلة الغم ولا حتى أقوى من كل مجلس الشعب والشورى اللي أطيح بهم في غضبة صغيرة من الشباب وما خفي عند شعبنا كان أعظم.
حضرتك قعدت وشربت الحاجة الساقعة والفريش؟؟؟؟
نخش بقا على المهم
موضوع انك تنام أو تقزقز لب والشغل البطال بتاع زمان ده تنساه خالص لعدة نقاط منها:
- الشعب كله مراقبك لأن من هنا ورايح جلسات مجلس الشعب هتبقى أولوية في كل بيت مصري بمعنى إن زي ما الكبير والصغير شاركوا في اختيارك الكبير والصغير بردو هيتابعوا شغلك ويشوفوا هم اختاروا بني آدم يستحق أو لا.
- كل العالم هيتابع علشان يشوف هل فعلاً المصريين اتغيروا أو لا وفي النقطة دي أبشرك إن معندناش أي استعداد إن واحد ملوش لزمة يشوه صورتنا اللي مات كتير علشان يصلحوها بعد ما بوظها ناس كانوا في نفس الكرسي اللي حضرتك قاعد عليه دلوقت.
- البلد صرفت ملايين على انتخابات والشعب ساب شغله علشان يكلف نفسه ويروح يختار حضرتك وبردو معندناش استعداد الملايين دي تضيع في الهواء.
انت دلوقت مش مسئول عن دائرتك فقط مصر كلها بكلمة منك ممكن يتغير وجهها, مصر دلوقت أمانة في رقبتك ووالله زي ما هنسأل مبارك وأذنابه عن أخطاءهم هنسألك عن تقاعسك في مصلحتنا كلنا.
حضرتك الزائر رقم
لمواضيعيرشدي العريضon
